2 Chinese nat’l, pinoy todas sa tambang

DALAWANG Chinese nationals at isang Filipino ang namatay at dala­wang menor de edad ang sugatan nang tambangan at pagbabarilin ng apat na ‘di kilalang armadong kalalakihan habang sakay sa isang kotse kahapon ng hapon sa lungsod ng Taguig.

Kinilala ang mga biktima na sina Ninjie Zhang, 42 anyos, lalaki, residente sa Bagong Silang, Caloocan City, at isang alyas Kauyu, kap­wa Chinese national; at isang alyas Noel, Filipino, residente sa Cavite.

Ginagamot sa Taguig Pateros Hospital ang dalawa pang biktimang menor de edad na sina Ana 5-anyos, at Marie, 12-anyos ng Brgy. 176 Bagong Silang, Caloocan City.

Sa report ng Taguig City Police, nangyari ang pamamaril sa tapat ng gusali ng Department of Science and Technology (DOST) sa Gen. Santos Avenue sa Bgy. Upper Bicutan, ng naturang lungsod dakong 2:30 pm.

Nabatid na lulan ang limang biktima ng isang itim na kotse nang hara­ngin ng apat na armadong lalaki saka binistay ng bala ang sasakyan.

Agad nagresponde ang mga tauhan ng puli­sya sa lugar kaya naisu­god ang mga biktima sa nabanggit na pagamu­tan.

Malalimang imbes­tigasyon ang isinasagawa ng Taguig City Police sa insidente habang ikinasa na ang follow-up operations para matukoy at mahuli ang mga suspek. (JAJA GARCIA)