GM Antonio imbitado sa Open Kitchen Rapid chess

INIMBITAHAN si 13-time Philippine Open Champion Grandmaster Rogelio “Joey” Antonio Jr. na ma­ging guest of honor sa Open Kitchen Rapid Chess Tournament sa tinam­pukang IM Joel Banawa Chess Cup (kiddies at juniors division) bilang paggunita sa namaya­pang IM Rolly Martinez na tutulak sa Linggo (September 1) sa Open Kitchen, Rockwell Business Center-Sheridan, High­wayhills, Greenfields District sa Mandaluyong City.

Si Antonio, ang 2017 Italy World Seniors Vice-Champion ay inaasahang mangunguna sa simple opening ceremonies da­kong 10:30am sa torneong ito na sanctioned ng National Chess Federation of the Philippines na pa­nga­ngasiwaan ng mga arbiters mula Chess Arbiter Union of the Philippines na suportado ng Open Kitchen, Phoenix Chess Academy, Three Knights Printing Services, ChiliJuan, Otsuka-Solar Philippines Inc. (Pocari Sweat), Core of Dreams, Mega C, Ripples Daily at ng PTV Sports.

Kasama din sa naim­bitahang magbubukas ng torneo  si Atty. Cliburn Anthony Orbe, National Chess Federation of the Philippines (NCFP) director na makakasama sa ceremonial moves si Antonio.

Matatandaan  na si Antonio ang nagkampeon sa Open Kitchen tour­nament nung Agosto 5 na sinundan ng paghahari sa Senior’s event ng IGB Dato’ Tan Chin Nam Inter­national Chess Open na ginanap sa Cititel Mid Valley sa Kuala Lumpur, Malaysia nitong August 18 at ng 2nd Torrevillas Knights Cup Open Rapid chess tournament na ginanap sa  Samar College sa Catbalogan City, Samar nung Agosto 21.

Ang Quezon City based Antonio, 57, ay naka-schedule katawanin ang Pilipinas sa FIDE (World Chess Federation) World Seniors Chess Cham­pionship na susu­long sa November 11 hanggang 24 sa Bucha­rest, Romania.

(Marlon Bernardino)