Nancy Binay: Total ban dapat igiit vs Chinese construction workers

PROTEKTAHAN  ang kapakanan ng mangga­gawang Filipino.

Ito ang giit ni reelec­tionist Senator Nancy Binay sa panawagan ni­yang “total ban” sa pag­pag­pasok ng mga traba­hanteng Tsino o Chinese construction workers, pati na rin ang ibang lahi, partikular sa infras­truc­ture projects ng gobyer­no.

Ayon kay Binay, hin­di patas at dis­advan­tageous sa mga mangga­gawang Filipino ang polisiya at kasunduan na nakatali sa utang natin sa China na ginagawang requirement ang pagka­karoon ng Chinese workers.

Dagdag ni Sen Binay, ‘di katanggap-tanggap ang dahilan ng Palasyo na kailangan ng Mandarin-speaking Chinese laborers dahil puro Chinese cha­racters ang nakasulat sa mga equipment.

At kung nasa sali­tang Chinese o Japanese man ang mga pinaaandar na makina’t equipment, sapat na ang isang inter­preter para punan ang communication gap.

Sinabi rin ni Binay, pangako ng adminis­trasyon ang pagbibigay ng trabaho sa mga Filipino mula sa flagship program na Build, Build, Build.

Hindi umano matu­tu­pad ang pangakong ito kung magkakaroon ng pagkiling sa dayuhang manggagawa dahil sa mga kondisyon na naka­lakip sa mga official development assistance (ODA) loans.

(NIÑO ACLAN)