HATAW! D'yaryo ng Bayan hatawtabloid.com
DALAWANG weekends na magiging batikang aktor si Joel Lamangan. Opo, si Joel Lamangan na premyadong direktor sa pelikula, sa telebisyon, at sa teatro (stage).
Pero hindi sa pelikula at hindi rin sa TV aarte si Direk. Sa teatro siya aarte—na walang “cut!” at take 2 sakaling magkamali siya.
Pero hindi acceptable na magkamali siya—dahil siya ang bida sa Ang Buhay ni Galileo. At bilang bida, limang minuto lang siguro siyang wala sa entablado at hindi kasali sa eksena.
Sa September 28-30 at October 5-7 itatanghal ng Philippine Educational Theater Association ang Ang Buhay ni Galileo sa PETA Theater Center sa Eymard Drive, Quezon City. Ang manunulat ng pelikulang Goyo ni Paulo Avelino ang magdidirehe sa kanya, si Rody Vera, na napakarami ng award bilang playwright.
Bagama’t may ilang bahagi ng Ang Buhay ni Galileo na may aawit na koro, matinding drama ang pagtatanghal. Drama ng pakikipagtunggali ng isang intelektwal na siyentista sa institusyon ng simbahan na ‘di sanay na may kumukontra, ‘di sumasang-ayon sa kanila.
May mga eksenang galit na galit si Galileo, may nalulungkot, nagsisisi, nakikipagtalo, nagpapaliwanag, humahalakhak, nang-uusig. Napakaraming emosyon siyang daranasin at itatawid para mapangibabaw ang katotohanan ng siyensiya sa mga sapantahang inuuban na. At ‘yon ay ang paniniwalang sa daigdig umiinog ang mga planeta at lahat ng nasa kalawakan; ang mundo ay sentro ng universe.
Mathematician, astronomer, at physicist si Galileo na matiyagang gumamit ng teleskopyo para siyasatin ang mga planetang nasa kalawakan. Mga 60 years old na siya sa istorya pero ‘di mangingimi na ipaglaban ang katotohanan.
Sa tunay na buhay ay senior citizen na rin si Direk Joel. Kakayanin ba n’yang pumagitna sa entablado mula sa umpisa hanggang sa katapusan ng pagtatanghal na lagpas sa dalawang oras?
Pero may sense of humor din naman ang karakter ni Galileo. At napakahilig n’ya sa masasarap na pagkain. ‘Di siya siyentistang ‘pag nagsimula nang magtrabaho ay nakalilimutan nang kumain!
Sa totoo lang, pangatlong round na ni Direk Joel na gaganap na Galileo. Una n’yang ginampanan ‘yon noong 30-anyos na siya noong 1981, noong ang PETA ay sa mga guho pa ng Fort Santiago sa Intramuros nagtatanghal. Noong Nobyembre ng nakaraang taon, ginampanan n’ya muli ang matandang henyo sa isang espesyal na pagtatanghal ng PETA sa Fort Santiago (at doon namin siya napanood).
Halos kalalabas lang ni Direk Joel sa pelikula ni direk Louie Ignacio na School Service na itinanghal noong Agosto bilang entry sa Pista ng Pelikulang Pilipino.
Ilang buwan lang din ang nakalipas noong idinirehe n’ya ang musical na Binondo sa The Theater at Solaire (casino-hotel).
KITANG-KITA KO
ni Danny Vibas
