HATAW! D'yaryo ng Bayan hatawtabloid.com
TAMPOK ang life story ni Ahwel Paz sa MMK ngayong Sabado. Gagampanan ni Francis Magundayao ang katauhan ni Ahwel at kasama rin dito ang award winning actress na si Ana Capri, bilang mahal na nanay ni Ahwel.
Base sa FB post ni Ahwel, narito pa ang ilang info sa episode ng weekly drama anthology ni Ms. Charo Santos-Concio. “May mga bahagi ng pagkatao ko na mas gusto kong yakapin at manatiling buhay sa aking puso. Mga pagsubok na nagpatatag sa akin. Ang makita ang kuwento ko sa katauhan nina Raikko Mateo, Louise Abuel at Francis Magundayao ay lalong nagpaalab sa akin ang pagmamahal sa pamilya.
Magamit itong lakas para maghilom ang mga sugat. Mula po sa amin papunta sa inyong mga tahanan, inaanyayahan ko po kayo na tipunin ang buong pamilya at magsama-sama sa panonood ng MMK ngayong Sabado, Pebrero 10 sa ganap na alas-osto ng gabi dahil ito ay KUWENTO NATIN!”
Nang makapanayam namin ang DZMM anchor at negosyanteng si Ahwel, hindi pa niya alam na nominated siya sa PMPC Star Awards for Movies for Best New Movie Actor para sa pelikulang Bhoy Intsik. Kaya sobra siyang natuwa at nagulat nang ibalita namin ito sa kanya.
Reaction niya sa mensahe namin, “Oh my dear Lord!!! All for His glory!!! Nominated po?” Dagdag niya, “Ipagno-novena ko po… Thanks po Kuya!”
Nang nabasa na niya ang lists ng mga nominado, ito pa ang nasabi niya, “Oh my gosh! Ang hirap ng mga kalaban! Bahala na po si Lord pero ilalambing ko sa Kanya na ma-nalo po sana para sa pamil-ya ko lalo na si Nanay. Maging masaya po siya.”
Hinggil pa rin sa MMK episode, ”Ma’am Charo personally chose my story after reading Tito Ricky Lo’s feature of me. She readily called MMK prod to contact me. I did not have any hand in the production except the script. Walang dagdag walang bawas,” pahabol na kuwento ni Ahwel.
Nabanggit din ni Ahwel na kasama siya sa movie nina Kim Chiu and Ryan Bang for Star Cinema at sa movie na The Significant Other with Erich Gonzales and Lovi Poe na palabas na sa Feb. 21.
ALAM MO NA!
ni Nonie Nicasio
