Puganteng Kano tiklo sa Angeles

CAMP OLIVAS, Pampanga – Isang puganteng American national na may patong-patong na kaso ang nasakote nang pinagsanib na puwersa ng Police Station 5, at Fugitive Search Unit-ng Bureau of Immigration (BI) sa ikinasang operasyon sa Angeles City.

Ayon sa ulat na nakarating sa tanggapan ni Supt. Fe Grenas, tagapagsalita ni Chief Supt. Aaron N. Aquino, Police Regional Office-3 director, hindi nakapalag ang American national na si Wayne Collins y Russel, 63, nang dakpin ng mga operatiba ng Police Station 5, Angeles CPO at Fugitive Search Unit-Bureau of Immigration (BI) sa Azucena St., Timog Park Subd., Brgy. Pampang, Angeles City.

Base sa records ng BI, nahaharap si Collins sa kasong kidnapping, 7 counts assault battery, 6 counts burglary/larcency, homicide, robbery, 3 counts domestic violence at 3 counts obs-tructions/resist.

( LEONY AREVALO )