CAMP OLIVAS, Pampanga – Nasagip ng mga elemento ng Minalin Police Anti-Illegal Drug Operation Unit at mga operatiba ng Philippine Drug Enforcement Agency 3 (PDEA 3) ang isang 13-anyos drug runner, habang nadakip ang kanyang ina at dalawang drug user sa isinagawang buy-bust operation sa Brgy. San Isidro sa bayan ng Minalin, kamakalawa.
Ayon sa ulat ni C/Insp. Pearl Joy C. Gollayan, hepe ng Minalin Police, sa tanggapan ni Acting Pampanga Police Provincial Director, S/Supt. Joel R. Consulta, kinilala ang mga suspek na nahaharap sa kasong paglabag sa Republic Act 9165 o Comprehensive Dangerous Drug Act 2002, na sina Marites Quiazon, 40-anyos, ina ng 13-anyos binatilyo, nakatira sa Purok 1, Brgy, San Isidro; Jayson Navarro, 37, at Albert Navarro, kapwa taga Purok 3, Brgy. Dawe, sa nabanggit na bayan.
Natagpuan sa bahay ng mag-ina ang 38 pirasong maliit at malaking sachet ng hinihinalang shabu, at P14,000 marked money.
(LEONY AREVALO)
