HATAW! D'yaryo ng Bayan hatawtabloid.com
CAMP OLIVAS, Pampanga – Kapwa patay ang isang titser at 10-anyos niyang anak na lalaki makaraan gahasain ang ginang at pagsasaksakin ng anak ng kanilang labandera sa kanilang bahay sa Brgy. San Jose, Lubao, Pampanga kamakalawa ng madaling-araw.
Agad naaresto sa follow-up operation ng mga awtoridad ang suspek na si Rommel Canilao habang naka-check-in sa Twin Peaks Motel sa bayan ng Sto. Tomas sa nabanggit na lalawigan.
Inamin ni Canilao ang krimen at sinabing lasing siya nang mangyari ang insidente at tanging pagnanakaw ang kanyang intensiyon.
Gayonman, napilitan aniya siyang pagsasaksakin ang mga biktima nang magising habang hinahalughog niya ang bahay. Tinangay ng suspek ang mga alahas, gadgets at P10,000 cash.
Kasalukuyang nakapiit ang suspek sa Lubao Municipal Jail at nahaharap sa mga kasong robbery, rape with homicide, at murder.
( LEONY AREVALO )
