Retiradong Manila cop iimbestigahan sa Balcoba Slay

IIMBESTIGAHAN ng Manila Police District  (MPD) ang isang retiradong pulis sa Maynila na iniuugnay sa pagpatay sa kolumnistang si Alex Balcoba Sr., noong Biyernes ng gabi sa Quiapo, Maynila. Ayon kay Sr. Insp. Rommel Anicete, hepe ng MPD-Homicide Section, huling nakaaway ni Balcoba ang nasabing retiradong pulis noong nakaraang buwan kaya kanila nang ipinatawag para sa imbestigasyon.

Na-track na rin aniya nila ang nilalaman ng cellphone ni Balcoba na nakasaad ang pagbabanta ng suspek sa kanya.

Gayonman, ipinaliwanag ni Anicete, bagama’t kompirmadong isang gun for hire ang pumatay kay Balcoba hangga’t hindi naaaresto ang gunman ay wala rin direktang mag-uugnay sa suspek kaya hindi masasampahan ng kaso.

Sinabi ni Anicete, noon pang 2012 nagsimula ang away ni Balcoba at ang retiradong pulis na nag-ugat sa negosyo.

Sinampahan ni Balcoba ng kaso sa korte ang pulis habang kinasuhan ng libel ang kolumnista ng nasabing parak. Na-dismiss ang isinampang kaso ni Balcoba habang naka-pending pa ang kasong libel na isinampa ng pulis laban sa kanya.

Bukod sa retiradong pulis Maynila, isa pang opisyal ng MPD ang nakabangga ni Balcoba na sinasabing pinagbantaan din ang kolumnista.

Magugunitang naglaan ng P100,000 ang hanay ng MPD at MPD Press Corps para sa sino mang makapagtuturo sa suspek sa insidente.

Inilabas na rin ng MPD ang cartographic sketch ng suspek.