‘Di ako aasa sa Amerika — Duterte

INIHAYAG ni President-elect Rodrigo Duterte, hindi aasa ang Filipinas sa kaalyadong bansang Amerika, sa ilalim ng kanyang panunungkulan.

Ayon kay Duterte, bagama’t may kasunduan at malalim ang relasyon ng Filipinas sa Western allies kagaya ng US, gagawa nang sariling landas na tatahakin ang Filipinas.

Ngunit nilinaw na hindi ibig sabihin nito ay nais niyang paboran ang ibang bansa na hindi kasundo ng Amerika kagaya ng China.

Sinabi ni Duterte, nais niyang mangibabaw ang interes ng mga Filipino.

“We have this pact with the West, but I want everybody to know that we will be charting a course of our own.

“It will not be dependent on America. And it will be a line that is not intended to please anybody but the Filipino interest,” ani Duterte.

Samantala, tinitingnan ng ilang analysts na posibleng signal ito para sa muling pag-init ng relasyon ng Filipinas sa China na nagkalamat dahil sa mga pinag-aagawang teritoryo sa West Philippine Sea.

Ngunit sinabi ni Duterte, kanyang hihintayin ang magiging desisyon ng Permanent Court of Arbitration sa kasong inihain ng Filipinas laban sa Beijing kaugnay ng maritime dispute.