Virtrual farming bagong modus sa investment scam — SEC

NAGA CITY – May kumakalat na namang bagong modus ng investment scam at sangkot dito ang internet.

Kaugnay nito, nagpalabas ng abiso ang Securities and Exchange Commission (SEC) central office bilang paalala sa publiko na huwag sumali sa organisasyon na tinatawag na “Farm on Agricultural Production.”

Modus ng kompanyang ito na hikayatin ang publiko na mag-invest sa pamamagitan ng kanilang virtual farms at sinasabing may katumbas itong totoong sakahan at 50 percent ng kanilang investment ang posibleng kitain.

Ayon kay Atty. Fiona Bobis, securities Counsel ng SEC–Bicol, hindi rehistrado at walang lisensiya mula sa kanilang ahensiya ang naturang kompanya.

Hindi rin matukoy kung saang parte ng bansa ang sinasabing sakahan ng kompanya.

Sinasabing kapareho ng larong ‘Farmville’ ang proseso ng virtual farming na kailangan lamang magtanim at mag-alaga ng mga hayop ng investors upang kumita ng malaking halaga.

Paalala ng SEC, ikonsulta muna ng publiko sa kanilang listahan ang isang kompanya upang masiguro na isa itong legal na organisasyon.