Sabotahe sa Duterte-NDF talks itinanggi ng Palasyo

ITINANGGI ng Malacañang ang paratang ng Anakpawis Party-list na magkasabwat sina Sen. Antonio Trillanes at ang Liberal Party (LP) ni Pangulong Benigno “Noynoy” Aquino III para isabotahe ang peace talks sa ng Duterte administration at National Democratic Front of the Philippines (NDF).

Sinabi ni Communications Sec. Sonny Coloma, walang katuwiran, walang batayan at walang katotohanan ang alegasyon laban kay Pangulong Aquino.

Ayon kay Coloma, hayag at malinaw ang ‘commitment’ mismo ni Pangulong Aquino sa pagsusulong ng usapang pangkapayapaan.

“Wala pong katuwiran, walang batayan at walang katotohanan ang paratang na iyan laban kay Pangulong Aquino dahil hayag naman po ang ‘commitment’ ng ating Pangulo, by ‘deed and by action’, ipinakita niya o ginamit niya ang kanyang pagiging Pangulo sa pagbubuo ng mga kinakailangang hakbang para isulong ang prosesong pangkapayapaan,” ani Coloma.