Newscaster nabiktima ng basag-kotse

NABIKTIMA ng basag-kotse gang ang isang newscaster ng PTV 4 sa tapat ng Agora Public Market sa San Juan City, nitong Linggo.

Ipinarada ni Kirby Cristobal ang bagong biling van sa naturang lugar nitong Sabado ng gabi.

Nakatanggap siya Linggo ng umaga ng text message mula sa isang parking attendant na sinabing nabasag ang salamin ng kanyang van.

Natangay mula sa sasakyan ang nasa P10,000 cash at bagong stereo.

Naiwan pa sa upuan ng van ang plais na ginamit sa pagbaklas ng stereo.

Ipinagtataka ni Cristobal kung bakit wala man lamang nakakita sa mga suspek.

Halos 50 metro lamang ang layo ng presinto ng pulis mula sa pinangyarihan ng insidente.

Habang ayon kay Cesar Otienang, construction worker sa kalapit na ginagawang tindahan, wala silang narinig na alarm mula sa van.

Nakita lamang aniya nila na bumubukas-sindi ang ilaw ng sasakyan kahapon ng madaling-araw.