2 tatay nag-suicide sa CamSur

NAGA CITY – Problema sa kanilang karelasyon ang itinuturong dahilan ng pagpapakamatay ng dalawang padre de pamilya sa lalawigan ng Camarines Sur.

Ayon sa ulat ng pulisya, nakita ng kanyang mga katrabaho ang katawan ng biktimang si Reynante Remodo, 42, ng bayan ng Tigaon, habang nakabitin sa loob ng pinagtatrabahuang repair shop.

Ayon sa mga kaanak ng biktima, bago ang pangyayari ay napansin nilang palaging tahimik at malungkot si Remodo dahil sa paghihiwalay nila ng kanyang kinakasama.

Sinasabing umalis ang kanyang live-in partner at isinama ang kanilang anak.

Samantala, sa karatig bayan ng Sagñay, nagpakamatay din sa pamamagitan ng paglunod sa sarili ang biktimang si Jonard Tadeo, 39-anyos.

Nakita ng mga tauhan ng Philippine Coast Guard (PCG) ang biktimang wala nang buhay sa pampang ng dagat malapit sa port ng Brgy. Nato.

Pinaniniwalaang lasing at mag-isang lumusong sa dagat si Tadeo upang lunurin ang sarili.

Bago ito, may hindi pagkakaunawaan si Tadeo at ang kanyang kinakasama na itinuturong dahilan ng kanyang pagpapakamatay.