Werfast, PNP off’ls ipinaaaresto rin ng Sandiganbayan (Sa P100-M courier service scam)

INIUTOS na ng Sandiganbayan ang pag-aresto sa 10 kataong sangkot sa  maanomalyang P100-milyon courier service scam ng Philippine National Police (PNP) sa Werfast Documentation Agency Inc.

Kabilang dito ang Werfast owner na si Mario Juan, negosyanteng si Salud Bautista, retired Civil Security Group chief Gil Meneses, dating Firearms and Explosives Office chief Napoleon Estilles, dating Chief Supt. Allan Parreño, Senior Supt. Melchor Reyes, Senior Insp. Ford Tuazon, Werfast incorporators Enrique Valerio, Lorna Perena at Juliana Pasia.

Kamakalawa ay inaresto na si dating PNP Chief Alan Purisima, pangunahing sangkot sa courier service deal, paglapag ng sinasakyang eroplano sa Ninoy Aquino International Airport (NAIA) terminal 3.

Humaharap sa kasong graft si Purisima dahil sa sinasabing maanomalyang kontrata ng PNP sa pag-deliver ng lisensiya ng baril sa mga aplikante noong 2011.

Agad nakalaya ang dating PNP chief nang magpiyansa ng P30,000.

Ngunit inilinaw ng abogado ni Purisima na si Atty. Dexter Corpus, kusang sumuko at hindi inaresto ng mga awtoridad ang kanyang kliyente dahil sa warrant of arrest.