Reklamo vs Duterte tuloy — Ombudsman

HINDI iaatras ng Office of the Ombudsman ang imbestigasyon kay president-elect Rodrigo Duterte kaugnay sa inihaing patong-patong na mga reklamo ni Sen. Antonio Trillanes IV.

Ayon kay Ombudsman Conhita Carpio-Morales, obligado sila sa kanilang trabaho na imbestigahan ang sino mang opisyal ng pamahalaan na nahaharap sa administrative or criminal complaint.

Dahil dito, ipagpapatuloy nila ang pag-imbestiga sa reklamong plunder, graft at malversation na kinakaharap ni Duterte.

Dagdag ni Morales, kung magpositibo ang kanilang imbestigasyon sa mga anomalyang ikinakabit sa pangalan ni Duterte, sunod na maghahain sila ng resolusyon sa Kongreso para sa impeachment case.

Nag-ugat ang nasabing reklamo ni Trillanes laban kay Duterte nang isiniwalat niya sa publiko ang sinasabing pagtanggap ng presumptive president ng higit 11,000 contractual workers para sa lungsod ng Davao noong 2014 kaya gumastos ang lokal na pamahalaan ng P708 milyon para sa pasahod at iba pa.