Peace talks isasabotahe ng anti-communists (Ayon kay Joma)

NAGBABALA si Communist Party of the Philippines (CPP) founder Jose Maria Sison kaugnay sa pananabotahe ng aniya’y mga ‘rabid anti-Communists’ na humaharang sa kanyang pagbabalik sa Filipinas.

Partikular na tinukoy ni Sison sina Sen. Antonio Trillanes at Commission on Human Rights (CHR) chairman Chito Gascon na nagbabanta ng imbestigasyon laban sa sinasabing krimeng nagawa niya.

Sinabi ni Sison, alam mismo ni Gascon bilang dating negosyador para sa gobyerno, na siya ay protektado ng JASIG (Joint Agreement on Safety and Immunity Guarantees).

Ayon kay Sison, posible rin makadiskaril sa peace negotiations ang mga propaganda laban sa komunismo.

Tiniyak din ng CPP founding chairman, hindi sila magtatakda ng ano mang kondisyon bago simulan ang peace talks, ngunit dapat lamang sundin ang mga nauna nang kasunduan para manatili ang kompiyansa nila sa gobyerno.