Obama binati si Duterte

KARANGALAN para kay President-elect Rodrigo Duterte ang makausap si U.S. President Barack Obama.

Ayon kay Duterte, si Obama ang pinakaunang head of state na tumawag at bumati sa kanya makaraan ang panalo sa halalan.

Sa kanilang pag-uusap, tiniyak ni Duterte kay Obama na mananatiling kaalyado ng Amerika ang Filipinas, partikular sa usapin ng pinag-aagawang teritoryo sa West Philippine Sea.

Ngunit ipinaabot mismo ni Duterte kay Obama na bukas ang incoming president sa bilateral talks sa China kung walang patutunguhan ang mga kasalukuyang hakbang na ginagawa para maresolba ang tensiyon sa pinag-aagawang teritoryo.

Ayon kay Duterte, hinimok siya ni Obama na hintayin ang magiging desisyon ng arbitration tribunal sa kasong inihain ng Filipinas laban sa China.

Una nang sinabi ng White House na ipinaabot din ni Obama kay Duterte ang kahalagahan ng pagrespeto sa karapatang pantao at ‘rule of law’.