Droga, armas, gadgets, appliances nakuha sa ika-33 Galugad sa NBP

MULING nakakuha ng 150 gramo ng shabu at iba pang mga kontrabando ang mga tauhan ng Bureau of Corrections (BuCor) sa ika-33 “Oplan Galugad” sa New Bilibid Prison (NBP) sa Muntinlupa City kahapon.

Ayon kay NBP Supt. Richard Schwarzkopf Jr., maaga pa lamang ay ginalugad ng BuCor personnel ang mga selda sa Building 3 at 13 sa quadrant 3 ng maximum security compound na kinaroroonan ng mga kasapi ng mga grupong Happy Go Lucky, Batang Cebu at Sputnik.

Nakakuha ang mga awtoridad ng dalawang improvised shotgun (sumpak), mga bala ng baril, ilang electronic gadgets, appliances at sangkaterbang TV antenna.

Habang dalawang preso na hindi binanggit ang pangalan ang nahulihan ng 150 gramo ng shabu na inilagay sa isang medyas at nilagyan ng magnet bago idinikit sa yero ngunit nabisto sa biglang pagdating ng mga awtoridad.

Ayon kay Shwarzkopf, mahaharap sa karagdagang kasong administratibo ang dalawang inmates na nakatakdang ilipat sa isolation cell.

Posible rin silang tanggalan ng prebilihiyong madalaw ng kanilang mga kaanak at maapektuhan ang tinatawag na good conduct term allowance na ibinibigay sa mga bilanggo.

Siniguro ng opisyal na umiiral pa rin ang mahigpit na seguridad at tuloy-tuloy ang isasagawang Oplan Galugad sa NBP hanggang sa maubos ang mga kontrabando sa nasabing kulungan.