3 patay, 17 naospital sa cholera outbreak sa CamSur island

NAGA CITY – Patay ang tatlong menor de edad habang umabot sa 17 ang isinugod sa ospital dahil sa pagtatae at pagsusuka sa islang bayan ng Caramoan, Camarines Sur.

Ayon kay Dr. Napoleon Arevalo, OIC regional firector ng Department of Health (DOH) Bicol, dalawa sa mga namatay ay 5-anyos at isang 16-anyos.

Ayon sa ginawang disease surveillance ng DoH-Bicol at sa imbestigasyon sa lugar, lumalabas na ang kontaminadong tubig ang sanhi ng sakit na hindi pa makompirma kung dahil sa E. coli o cholera.

Nagsimulang makaramdam ng pananakit ng tiyan at pagsusuka ang mga biktima noong kasagsagan ng eleksiyon.

Dahil abala ang karamihan, nabalewala ang naramdaman ng mga pasyente sa pag-aakalang simpleng loose bowel movement (LBM) lamang ito.

Bukod dito, aabot din sa isa’t kalahating oras ang biyahe bago makarating sa Municipal Hospital sa nasabing bayan.

Ang tatlo aniyang namatay ay dead on arrival na sa ospital.

Sinabi ni Arevalo, noong mga nakaraang taon ay may naitalang kaso ng cholera sa naturang bayan dahil sa kakulangan ng basic sanitation facility.

Napag-alaman, 46 porsiyento lamang ng mga kabahayan sa lugar ang mayroong sariling palikuran.

Ang E.coli na madalas na nagiging sanhi ng pagtatae at pagsusuka ay nakukuha sa dumi ng tao.

Binabantayan ng nasabing tanggapan kung madaragdagan pa ang mga naoospital ngunit sa nakaraang mga araw ay wala na aniyang nairerehistrong panibagong kaso.