DPWH puspusan sa ‘Oplan Baklas’

ABALA ang Department of Public Works and Highways (DPWH) sa pagbabaklas ng campaign posters na iniwan ng mga kandidato sa mga pampublikong estruktura.

Sa pagtaya ng Oplan Baklas team, aabutin sila ng isang linggo bago tuluyang matapos sa paglilinis sa Merto Manila.

Sa ngayon, katuwang nila ang MMDA ngunit mas mapapadadali raw ang kanilang aktibidad kung may dagdag na tulong ng volunteers.

7 tons basura sa kampanya nahakot sa Pasay, Maynila

NANAWAGAN ang grupong Ecowaste Coalition sa publiko na maging malikhain sa naiwang mga basura na dulot ng halalan.

Ito dahil ayon sa Metro Manila Development Authority (MMDA), sa Manila at Pasay pa lamang ay aabot na sa pitong tonelada ang nakolektang campaign paraphernalia kabilang ang mga tarpaulin, posters at iba pa.

Dahil dito, hinimok ni Aileen Lucero, Coordinator ng EcoWaste Coalition, ang publiko na maging creative para mapakinabangan ang mga basura.

Puwede aniyang gawing apron o shopping bags ang mga tarpaulin habang ang posters ay puwedeng gawing folder, envelope at picture frame.

Ang sample ballots ay puwedeng gawing notepads lalo na’t karaniwang wala itong sulat sa likod.

Inaasahang madaragdagan pa ang mga basurang makokolekta sa kalakhang Maynila maging sa iba’t ibang lugar sa bansa.