Rider todas sa riding in tandem

PATAY ang isang motorcycle rider makaraan barilin ng isa sa dalawang hindi nakikilalang mga suspek na sakay ng motorsiklo habang ang biktima ay sakay rin ng kanyang motorsiklo sa Malabon City kamakalawa ng hapon.

Agad binawian ng buhay ang biktimang si Ryan Mata, 29, residente ng 802 BGISIS Mansion, N. S. Amoranto, Quezon City.

Habang patuloy ang imbestigasyon ng mga ng pulis upang matukoy ang pagkakilanlan ng mga suspek.

Sa imbestigasyon ni PO3 Alexander Dela Cruz, dakong 5:40 p.m. sakay ang biktima ng kanyang Yamaha Mio Sporty habang tinatahak ang kahabaan ng Maria Clara St., Brgy. Acacia nang biglang dikitan siya ng dalawang hindi kilalang suspek na sakay rin ng motorsiklo.

Agad bumunot ng baril ang nakaangkas na gunman at pinaputukan sa pisngi ang biktima bago mabilis na tumakas patungong Gov. Pascual.

Narekober ng mga tauhan ng Scene of the Crime Operatives (SOCO) sa lugar ng insidente ang isang basyo ng bala ng hindi pa mabatid na kalibre ng baril at cash na aabot sa P32,000.

Lumalabas sa imbestigasyon na dating alitan ang motibo sa krimen.