Pinoy hackers nagdeklara ng ‘ceasefire’

NAGDEKLARA ng ‘ceasefire’ ang Anonymous Philippines, ang grupong sangkot sa pag-hack ng ilang government websites.

Tiniyak ng grupong Anonymous Philippines, kanila itong ipatutupad hanggang sa proklamasyon ng bagong presidente ng Filipinas.

Samantala, inihayag ng tagapagsalita ng grupo na magmula noong 2010 ay tuloy-tuloy nilang mino-monitor ang system ng Commission on Elections (Comelec).

Noong 2013 palang aniya ay kanilang ibinunyag na mahina ang website ng poll body.

Malinaw aniya ang kapabayaan ng Comelec sa usaping ito dahil hindi na-upgrade ang systems ng poll body.

Binalaan ng grupo ang poll body na panatilihing malinis ang halalan sa Mayo 9.

Anila, ito ay dahil hawak pa rin nila ang higit 50-million voters information na nakuha nila nang ma-hack ang website ng Comelec noong Marso.

Ngunit mariing itinanggi ng grupo ang pagkakasangkot sa pagsisiwalat sa internet ng voters’ information.