6 patay, 11 sugatan

CAUAYAN CITY, Isabela – Nauwi sa trahedya ang masaya sanang outing sa lalawigan ng Aurora ng mga magkakamag-anak na sakay ng isang pampasaherong van kahapon.

Anim na ang patay mula sa 17 sakay ng isang passenger van na nahulog dakong 2:30 a.m. sa halos 50 meters na lalim ng bangin na dumiretso sa ilog sa Brgy. Ismael, Maddela, Quirino.

Ayon kay Chief Insp. Avelino Cuntapay, Police Community Relations Officer ng Quirino Police Provincial Office (QPPO), patungo sana sa isang outing sa Aurora province ang mga biktima nang biglang mawalan ng preno ang van sa nasasakupan ng Brgy. Ismael.

Dumiretso sa ilog ang van makaraan mahulog sa bangin kaya’t hindi na nakaligtas ang mga namatay na kinabibilangan ng dalawang babae at apat na lalaki.

Ang pampasaherong van na biyaheng Santiago City-Ilagan City ay minamaneho ni Edgar Taccaban na kabilang sa mga namatay.

Ang 11 sugatan ay isinugod sa Quirino Province Medical Center sa Cabarroguis, Quirino.

Sinabi ni Chief Insp. Godofredo Wasin, hepe ng Maddela Police Station, kabilang sa mga namatay ang isang Ester Mamaoag ng Angadanan, Isabela. May mga bata rin sa mga nasugatan.

Patuloy ang imbestigasyon ng pulisya sa trahedya at inaalam pa ang pangalan ng lahat ng mga biktima.