Recom tadtad ng 66 kaso sa Ombudsman (Lahat irregular deals — CoA)

MISTULANG durog sa tadtad na 66 kaso sa Ombudsman si Cong. Recom Echiverri, tumatakbong mayor ng Caloocan, matapos ibunyag ni Jerrboy Mauricio, Brgy. 68 chairman sa isang press conference.

Ayon kay Mauricio, ito ay nagsimula nang maghain siya ng kasong malversation laban kay Recom noong Hunyo 2015 dahil sa P72-milyon insurance scam, at nagsunod-sunod na ang ibang mamamayan na naghain ng kaso laban kay Recom mula Hunyo hanggang Disyembre nang nakalipas na taon.

Inihayag ng abogado ni Mauricio na si Atty. Bong Cordova, lahat ng mga kaso ay hinatulan na ng Commission On Audit (COA) na mayroong ‘iregularidad’ na transaksiyon at naisyuhan na ng “Notice of Disallowance.”

Ang notice of disallowance ay ini-issue ng COA sa mga maanomalyang transaksiyon sa gobyerno, at ipinasasauli ang perang nagastos dito mula sa mga nakipagtransaksiyon.

Karamihan sa 66 kaso ay kinabibilangan ng paglalaan ng pondo na wala namang naka-itemize na projects, mga biniling kagamitan na overpriced, mga walang bidding na projects, at iba pa. Dahil dito, nahaharap si Recom sa patong-patong na kasong malversation, technical malversation, violation of the Anti-Graft and Corrupt Practices Act, violation of Procurement Law, falsification of public documents, at marami pang iba pa.

Binigyan ni Cordova dumalong taga-media sa press conference ng summary spread sheet ng 66 kaso ni Recom, kabilang rito ang case numbers, complainants, date filed, amount involved, at status.