11-anyos bata patay sa anti-dengue vaccine?

NILINAW ni Health Secretary Janette Garin, hindi dulot ng anti-dengue vaccine ang pagkamatay ng 11-anyos batang lalaki na binakunahan bago binawian ng buhay.

Ayon kay Garin, ang pangunahing sanhi ng pagkamatay ng pasyente ay pulmonary edema o pagkalunod ng kanyang baga.

Posible rin aniyang ang sanhi ng pagkamatay ay bunsod ng congenital heart disease at acute gastroenteritis with moderate dehydration.

Nilinaw ni Garin, hindi kasama sa ‘contrandication’ ng dengue vaccination ang ‘congestive heart failure’.

Nauna nang napaulat na dumulog sa DoH ang pamilya ng nasabing pasyente na galing sa Bagac, Bataan, nang mamatay ang biktima noong April 10 makaraang mabakunahan noong Marso 31.

Mula anila nang mabakunahan ang pasyente ay lumala na ang kanyang kondisyon.

Nabatid na ang pasyente ay may congenital heart disease at nabakunahan kahit na siya ay may lagnat.