Ex-LWUA Head Pichay, 3 pa swak sa graft

SASAMPAHAN ng patong-patong na kaso sa Sandiganbayan si dating Local Water Utilities Administration (LWUA) administrator Prospero Pichay at iba pa niyang mga kasamahan.

Tinukoy ng Office of the Ombudsman ang paglabag ni Pichay sa Anti-Graft and Corrupt Practices Act at Code of Conduct and Ethical Standards of Government Employee dahil sa paggamit ng P1.5 milyon fund para mag-sponsor sa isang chess tournament.

Partikular na rito ang 2nd Chairman Prospero Pichay Jr. Cup International Chess Championship ng National Chess Federation of the Philippines noong 2010.

Bukod sa dating pinuno ng LWUA, kasama rin sa kakasuhan ang kanyang dating deputy acting administrator na si Wilfredo Feleo, dating senior deputy administrator Emmanuel Malicdem at dating administrator Daniel Landingin.

Samantala, ibinasura ng Ombudsman ang paghahain ng reklamo kay treasury department manager Eleanora De Jesus dahil sa kakulangan ng merito.