P375-M shabu tiklo sa 2 Chinese, 2 Taiwanese

APAT dayuhang drug dealer, pawang Chinese at Taiwanese national,  ang naaresto ng mga tauhan ng Quezon City Police District – District Anti-Illegal Drugs makaraang makompiskahan ng 75 kilo ng shabu na nagkakahalag ng P375 milyon “street value” kahapon ng hapon sa nasabing lungsod.

Sa inisyal na ulat, ayon kay Chief Insp. Enrico Figueroa, hepe ng DAID, naging katulong nila sa operasyon ang District Special Operation Unit (DSOU) na pinamumunuan ni Supt. Jay Agcaoili.

Samantala, kinilala ni Chief Insp. Figueroa ang mga nadakip na sina Chu Cheng, Taiwanese; Wei Chang Lee, Chinese;  Henry Go Sy, Chinese national; at Shan Wen Lee, Taiwanese national.

Ayon kay Chief Insp. Figueroa, nadakip ang apat dakong 5:30 p.m. sa isinagawang buy-bust operation sa parking lot ng isang food chain restaurant sa Philcoa, Quezon City.

Dagdag ng opisyal, dinakip ang apat makaraan bentahan ng isang kilo ng shabu na nagkakahalaga ng P5 milyon ang isang poseur buyer.

Nang inspeksyonin ng mga operatiba ang dalang mga sasakyan ng apat, tumambad sa kanila ang 74 kilo ng shabu.