Kagawad ng barangay pinatay dahil sa kalabaw (Sa Quezon province)

NAGA CITY – Patay ang isang barangay councilor makaraan barilin ng kapwa magsasaka dahil lamang sa kalabaw sa Polilio, Quezon kamakalawa.

Kinilala ang biktimang si Ernie Azul, 38, incumbent barangay councilor.

Ayon kay Insp. Jun Balilo ng PNP-Polilio, nakapasok sa lupain ng suspek na si Hizel Azores, 47, ang kalabaw ng biktima kung kaya minabuti niyang dalhin ito sa barangay hall upang hindi makaperhuwisyo sa kanyang mga pananim.

Ngunit nasalubong ng biktima ang suspek at sa pag-aakalang nanakawin ang kalabaw ay agad bumunot ng baril upang paputukan si Azores.

Ngunit naunahan ni Azores si Azul at limang beses binaril na ikinamatay ng biktima.

Agad tumakas si Azores kasama ang kanyang asawa at anak lulan ng isang motorsiklo ngunit hinabol siya ng dalawang pamangkin ni Azul at saka tinaga.

Masuwerteng sa kamay lamang tinamaan si Azores na sa huli ay nadakip din ng mga pulis.

Nakatakdang sampahan ng kaso ang suspek habang nananatili na rin sa kulungan ang dalawang pamangkin ng biktima na nanaga kay Azores.

Napag-alaman, may matagal na ring hindi pagkakaunawaan ang dalawang pamilya.