State of calamity idineklara sa Cebu dahil sa El Niño

CEBU CITY – Isinailalim sa state of calamity ang probinsiya ng Cebu kamakalawa sa regular session ng sangguniang panlalawigan.

Sa ‘unanimous voting’ ay inilabas ang resolusyon para matugunan ang tumitinding problemang dulot ng El Niño phenomenon.

Naging basehan ng kapitolyo ang isinagawang imbestigasyon ng Cebu Provincial Agriculture’s Office at ng Provincial Disaster Risk Reduction and Management Office sa mga apektadong lugar.

Dahil dito, magagamit na ang natitirang pondo ng Quick Response Fund na umabot sa P34-M.

Ang nasabing pondo ay ibibigay sa mga apektadong lugar na matukoy ng nasabing mga ahensya.

Nabatid na mayroon nang mga lugar sa probinsiya na ang mga taniman ay nagbitak-bitak dahil sa matinding init.

Samantala, nagbabala ang Pagasa Central Visayas na titindi pa ang mararanasang init dahil sa nakalipas na 20 taon ay umabot na sa 33 degrees Celsius ang itinaas ng temperatura.