Beterano ‘di na kukupitan (PNoy nangako sa Araw ng Kagitingan)

TINIYAK ni Pangulong Benigno “Noynoy” Aquino III sa mga beterano ng Ikalawang Digmaang Pandaigdig, hindi na kukupitan ang kanilang mga pensiyon at benepisyong inilalaan sa kanila.

Ginawa ni Pangulong Aquino ang pahayag sa paggunita ng Araw ng Kagitingan kahapon sa Mt. Samat, Bataan.

Sinabi ng Pangulong Aquino, naayos na nila ang listahan ng mga tunay na beterano at nagkaroon na ng reporma sa pamamahagi ng mga benepisyo.

Ayon kay Pangulong Aquino, kabilang din sa naitaas ang daily substinence allowance ng mga beterano at pagsaayos sa Veterans’ Memorial Medical Center (VMMC) at nakapagpatayo ng isang operating complex, napalawak ang renal dialysis unit at pagkakaroon ng outpatient complex.

Patuloy din aniya ang pagtustos ng gobyerno sa educational assistance sa direct descendants ng mga beterano hanggang matapos ang kanilang pag-aaaral.

Sa nasabing okasyon, hindi naiwasang mamolitika si Pangulong Aquino at ikampanya ang kanyang mga kandidato sa eleksiyon.

Sinamantala rin ni Pangulong Aquino ang pagkakataon para magpaalam dahil ito na ang kanyang huling pagdalo sa paggunita ng Araw ng Kagitingan bilang Pangulo ng bansa.