6 manggagawa sa lagarian dinukot ng terorista

CAGAYAN DE ORO CITY – Anim na Kristiyanong sibilyan ang bihag ng mga miyembro ng tinaguriang Foreign and Local Terrorist Organization (FLTO) sa Lanao del Sur.

Ayon sa impormasyon, kinilala ang mga dinukot na sina Tado Hanobas, Buloy, Makol, Gabriel, Adonis at isang Isoy na pawang nagtatrabaho sa isang saw mill sa Purok 4, Brgy. Sandab, Butig.

Sinabi ng hindi nagpakilalang tagapagsalita ng Moro Islamic Liberation Front (MILF), kasalukuyan silang nakikipagnegosasyon sa Maute group.

Lumitaw ang pangalan ng nasabing grupo mula nang atakehin nila ang tropa ng mga sundalo noong Pebrero 20 na nagresulta sa pagkamatay ng tatlong sundalo at 11 ang sugatan na mga miyembro ng Armed Forces of the Philippines (AFP).

Aabot sa 20 ang napatay sa isang linggong bakbakan.

Kinilala ang nasabing engkwentro bilang Butig clash at aabot sa 335 pamilya ang lumikas patungong Marawi City habang 657 pamilya ang nanatili sa evacuation centers ng Masiu.