15-anyos kritikal sa saksak ng kalaban

KRITIKAL ang  kondisyon ang isang 15 anyos binatilyo makaraan pagsasaksakin ng kalabang grupo sa Tondo, Maynila kahapon ng madaling-araw.

Nilalapatan ng lunas sa Jose Reyes Memorial Medical Center ang biktimang si Jamuel Musngi, out of school youth, porter at residente ng 1455 Antonio Rivera St., Tondo, Maynila.

Habang tumakas ang suspek na si alyas Abo Manalo at kanyang mga kasama makaraan ang insidente.

Ayon sa imbestigasyon ni SPO2 Anthony Quilantang ng Manila Police District-Police Station 7, naganap ang insidente dakong 2 a.m. sa panulukan ng Gatmaitan at Juan Luna Streets, Tondo, Maynila.

Kasama ng biktima ang kanyang mga kaibigan habang nag-iinoman sa bahay ng isang Lenlen Guinto sa Ricafort St., Tondo, Maynila.

Pagkaraan ay nagkayayaan ang magkakaibigan na ituloy ang inoman sa bahay ni Crislyn Cajandab.

Gayonman, habang papunta sa bahay ni Cajandab ang grupo nang makasalubong nila ang grupo ni Manalo at humantong sa komprontasyon.

Tumakbo ang grupo ni Musngi ngunit nasukol ang biktima at si Ryan Pacio Trajano kaya pinagtulungan ng grupo ni Manalo.

Nakatakbo ang dalawa ngunit nakorner ng grupo ang biktima at inundayan ng saksak.

Pagkaraan ay mabilis na tumakas ang mga suspek.