10 parak sinibak sa Pangasinan (‘Di nagresponde sa robbery)

DAGUPAN CITY – Sampung miyembro ng Police Mangaldan sa lalawigan ng Pangasinan ang ini-relieve sa puwesto makaraan balewalain ang idinulog na robbery incident sa Brgy. Gueguesangen sa nagdaang Semana Santa.

Ayon kay Supt. Jackie Candelario, deputy director for operations ng Pangasinan Police Provincial Office, sinibak ang 10 pulis habang iniimbestigahan ang kanilang officer-in-charge na si Supt. Benjamin Ariola bunsod sa reklamong pinagpasa-pasahan nila ang natanggap na reklamo sa naganap na pagnanakaw.

Nabatid na nangyari ang insidente habang naka-full alert status ang pulisya sa buong bansa dahil sa paggunita sa Mahal na Araw.

Sakaling mapatunayang nagpabaya sa trabaho, maaari silang masuspendi o tuluyang masibak sa trabaho.

Hindi na muna inilabas ang pangalan ng mga akusadaong pulis bilang bahagi ng proseso.

Sa ngayon, pansamantalang nakabase ang pulis sa PPO-Lingayen habang nagpapatuloy ang imbestigasyon kaugnay sa reklamo.