Milyon-milyong pekeng produkto nasabat sa warehouse

NAKOMPISKA ng mga tauhan ng Northern Police District Special Operation Unit (NPD-DSOU) ang milyon halaga ng mga branded na damit, sapatos at mga bag sa isinagawang raid sa warehouse ng isang Chinese national sa Navotas City kamakalawa ng hapon.

Ayon kay Supt. Edgar Cariaso, hepe ng NPD-DSOU, nakatanggap sila ng reklamo hinggil sa sinasabing mga pekeng produkto na iniimbak sa naturang warehouse kaya isailalim ito sa surviellance operation.

Nang maging positibo, agad isinagawa ng mga tauhan ng DSOU ang raid dakong 5:30 p.m. sa bisa ng search warrant na inisyu ni Malabon Regional Trial Court (RTC) Judge Zaldy Docena ng Branch 170 sa warehouse sa 45-B, Bernardo St., San Rafael Village, Navotas City, at pag-aari ng isang Mike Jinsun.

Ngunit hinarang ang mga awtoridad ng isang Fengfu Xu, Chinese national, at ipinadlak ang gate na bakal at iba pang mga pinto papasok sa warehose gayonman nabigo silang pigilan ang pagsalakay ng mga pulis.

Narekober ng mga awtoridad sa loob ng warehouse ang mga pekeng produkto ng Dickies, American Star Apparel at Tribal Philippines.

Ang inisyung search warrant kontra kay Jinsun at sa hindi pa kilalang business partners niya ay base sa reklamo ng Dickies, American Star Apparel (Phils) Inc. na kinakatawan nina Hector Rodriguez at Tribal Philippines Alex Dee.

Kasamang inaresto si Xu at sinampahan ng kasong obstruction of justice, habang paglabag sa R.A, 7393 o Consumers Act of the Philippines ang isinampa kay Jinsun at sa business partner niya sa Navotas City Prosecutor’s Office.