Kaso pa vs RCBC manager et tal isinampa

MAGKAKAHIWALAY na diringgin ang mga kaso ni dating Rizal Commercial Banking Corp. (RCBC) Jupiter branch manager Maia Santos-Deguito sa Department of Justice (DoJ) at Makati City Prosecutor’s Office.

Magugunitang una nang nagtakda ng preliminary investigation sa Abril 12 at 19, 2016 ang DoJ sa reklamo ng Anti-Money Laundering Council (AMLC) laban sa dating bank manager dahil sa paglabag sa Anti-Money Laundering Act, habang kamakalawa lamang naihain ang kasong falsification of documents sa piskalya ng Makati.

Ang huling complaint ay inihain mismo ng RCBC.

Nag-ugat ang bagong kaso sa sinasabing pamemekeng ginawa sa account ni William So Go na nangyari sa RCBC Jupiter Street.

Kaugnay nito, hiwalay na kaso ang inihain ng negosyante sa Makati City Prosecutor’s Office laban kina Deguito at branch officer Angela Torres.

Ang mga usaping ito ay pawang iniuugnay sa $81 milyon sinasabing nakuha ng hackers Bangladeshi government’s bank account sa New York.