Bakuna vs dengue itutuloy ng DOH (Kahit walang WHO recommendation)

BAGAMA’T walang rekomendasyon mula sa World Health Organization (WHO), tuloy na simula sa Lunes ang pagbibigay ng libreng bakuna ng gobyerno sa mga estudyante ng pampublikong paaralan laban sa sakit na dengue .

Tiniyak ni Dr. Rose Capeding, pinuno ng Department of Microbiology sa Research Institute for Tropical Medicine (RITM), ligtas ang mga bakunang Dengvaxia.

Unang makatatanggap ng libreng bakuna ang hindi bababa sa siyam na taon gulang mula sa mga pampublikong paaralan ng CALABARZON, Central Luzon at Metro Manila.

Sinabi ni Gundo Weiler, WHO representative, kailangan ng rekomendasyon bago sila makabuo ng statement hinggil sa dengue vaccines.

Ipinaliwanag din ni  Weiler, ‘neutral’ ang posisyon ng WHO sa mga bakuna ngunit nilinaw na hindi ito nangangahulugang hindi ito ligtas.

Ipinaliwanag din niya na sa kabila man nang kawalan ng rekomendasyon, maaaring ituloy ng Filipinas ang pagbibigay ng nasabing bakuna.

Samantala, inihayag ni DoH spokesman Lyndon Lee Suy, sinabi ni Weiler na sinusuportahan ng international health organization ang desisyon ng gobyerno na ituloy ang pagbibigay ng bakuna kahit walang opisyal na rekomendasyon mula sa SAGE.

Una nang sinabi ng kagawaran ng kalusugan na sa Abril 4 na ang pagsisimula ng libreng dengue vaccines sa mga pampublikong paaralan na matatapos sa loob ng 20 buwan.

Bawat estudyante ay makatatanggap ng tatlong bakuna, isang beses sa bawat anim na buwan.