3 montenero suspek sa Mt. Apo fire

DAVAO CITY – Tatlong hindi pa kilalang mountain climbers na nagpaiwan sa tuktok ang hinihinalang responsable sa nagpapatuloy na forest fire sa Mount Apo.

Ito ang binigyang diin ng grupo ng bikers at trekkers mula sa lungsod ng Cotabato na nakasaksi sa pagsisimula ng sunog.

Malaki ang paniniwala ng mga kasapi ng Cotabato All-Terrain Bikers Association (CATBA), nag-ugat ang sunog sa tuktok na namataan ang tatlong mga camper na nagluluto ng pagkain nitong Sabado ng hapon.

Ayon kay Tutin Sapto, CATBA founding member, personal nilang nasaksihan ang sunog at nakuhaan pa nila ng larawan mula sa kanilang tent sa ibaba ng Lake Venado.

Sinabi ng grupo, plano rin nilang tumulong sa pag-apula sa sunog ngunit pinigilan sila.

Dahil dito, desmayado sila at tiningnan na lamang ang paglamon ng apoy sa mga kagubatan at damuhan ng Mount Apo.

Ang CATBA ay may 24 miyembro na umakyat sa Mount Apo sa pamamagitan ng Kapatagan Trail ng Digos City.

Samantala, kahapon ng madaling araw ay muling nagliyab ang malaking sunog sa Mount Apo na mas malaki pa sa unang sunog mula nitong Sabado ng hapon.

Napag-alaman, bumalik na sa kanilang kampo ang fire volunteers upang magpahinga nang biglang magliyab ang mas malaking sunog na bumaybay sa kagubatan ng Kapatagan, Digos City at Sta. Cruz, Davao del Sur na bahagi pa rin ng Mount Apo.