Pamilya Coloma minasaker sa Cagayan

TUGUEGARAO CITY – Inihahanda na ang kasong multiple murder laban sa lalaki na pumatay sa tatlong miyembro ng isang pamilya sa bayan ng Pamplona, Cagayan kamakalawa. 

Kinilala ang biktimang mag-asawa na sina Emilio at Hilaria Coloma at kanilang anak na si Maria Christina.

Batay sa imbestigasyon ng PNP Pamplona, sumugod ang suspek na si Ciano Bunag sa bahay ng pamilya Coloma at nagkaroon ng mainitang pagtatalo sa live-in partner na si Maria na humantong sa pananaksak.

Idinamay pa ng suspek ang mga magulang ni Maria Christina.

Natagpuan ang walang buhay na si Maria, 300 meter mula sa kanilang bahay, habang nakita ang mag-asawa na patay na sa loob ng bahay.

Sinasabing nagalit ang suspek dahil napapansin niya na ayaw na sa kanya ng kanyang kinakasama at maging ng mga magulang ni Maria.

Mabilis na tumakas ang suspek makaraan ang insidente ngunit agad din nahuli nang may nakapagsabi na nagtago sa kanilang lugar sa Apayao.