10 sugatan sa salpukan ng 2 tricycle sa CamNorte

NAGA CITY – Umabot sa 10 katao ang sugatan sa banggaan ng dalawang tricycle sa Brgy. Batobalani sa Paracale, Camarines Norte kamakalawa.

Napag-alaman, habang binabaybay ng tricycle na minamaneho ni Elias David, 61, kasama ang anak niyang si Jennifer David, ang kahabaan ng nasabing kalsada nang mahagip ito ng humaharurot na tricycle na minamaneho naman ni Reynante Ybarola.

Dahil sa lakas ng salpukan, bumaliktad ang tricycle na minamaneho ni Ybarola na lulan ang pito katao.

Agad itinakbo sa ospital ang mga biktima pawang nagkaroon ng sugat sa iba’t ibang bahagi ng katawan.

Sinasabing lasing si Ybarola kaya pagewang-gewang ang kanyang pagmamaneho.

Nakatakdang sampahan ng kasong reckless imprudence resulting in multiple physical injuries and damage to properties ang suspek.