Ex-army utas sa ambush sa Negros Occ (Mister ng kandidatong konsehal)

BACOLOD CITY – Patay ang isang retiradong sundalo na asawa ng kumakandidatong konsehal, makaraan barilin ng armadong grupo sa Moises Padilla, Negros Occidental kamakalawa.

Ang biktima ay kinilalang si Armando Castillo Secuya, 61, residente sa Brgy. Guinpana-an, Moises Padilla.

Batay sa impormasyong hawak ni Negros Occidental Police Provincial Office (NOCPPO) director, Senior Supt. William Señoron, nangyari ang insidente sa terminal ng sasakyan sa nasabing lugar pasado 3 p.m. kamakalawa.

Sinasabing hindi bababa sa anim katao ang humarang sa biktima at agad siyang pinaulanan ng bala ng kalibre .45 bago tumakas ang mga suspek patungong Sitio Loblob at Crossing Maldo sa parehong barangay.

Agad binawian ng buhay si Secuya dahil sa mga tama ng bala sa iba’t ibang bahagi ng kanyang katawan.

Malakas ang paniniwala ng pulisya na planado ang pagpatay dahil marami ang nagsagawa nito.

Iniimbestigahan ang posibleng motibo sa krimen upang mabatid kung may kaugnayan ito sa nalalapit na halalan.