7 katao kinasuhan ng AMLC (Sa money laundering)

PITO katao na ang nasampahan ng kaso ng Anti-Money Laundering Council (AMLC) kaugnay ng kontrobersiyal na $81 million money laundering sa bansa.

Sa pagdinig ng Senate Blue Ribbon Committee, sinabi ni AMLC Executive Director Julia Bacay-Abad, kabilang sa kanilang sinampahan ng kaso sina dating RCBC branch manager Maia Santos-Deguito, negosyanteng si Kim Wong, Weikang Xu at apat na account holders sa RCBC.

Ayon kay Abad, malakas ang ebidensiya na sangkot sa money laundering ang mga akusado dahil napatunayan na alam nila na ang napunta at dumaan sa kanilang pera ay nakaw.

Habang inabsuwelto ng AMLC ang Philrem Services Corporation sa pagsasabing regular transaction ang ginawa ng money remittance center at hindi alam na nakaw ang pera.

Tiniyak ni Abad na patuloy ang kanilang imbestigasyon para masampahan din ng kaso ang iba pang sangkot sa katiwalian.