5 nalunod sa beach sa Negros Occ. (Trahedya sa Easter Sunday)

BACOLOD CITY –Lima katao ang nalunod sa isang beach resort sa Hinigaran, Negros Occidental, kasabay ng selebrasyon ng Easter Sunday.

Kinilala ni SN2 Jeron Maloto ng Philippine Coast Guard ang mga nalunod na sina Mary Jane Tabligan Desucos, 49, ng Doña Juliana Subd. Lungsod ng Bacolod; Kian Tabligan Betilla at Nica Betilla ng Brgy. Singcang, Bacolod City; Jane Rose Tabligan, 11, ng Binalbagan, pawang magkakamag-anak; at ang kanilang kaibigan na si Wil John Brillo, 24, ng bayan ng San Enrique, Negros Occidental.

Masuwerteng nakaligtas ang dalawa nilang kasamahan na sina Jefferson Tabligan, 24, ng Doña Juliana, Bacolod City, at Kimberly Betilla ng Brgy. Singcang, Bacolod City, naka-confine sa pagamutan sa Bacolod City.

Nangyari ang insidente sa Paradiso Beach Resort sa Brgy. Miranda, Hinigaran, makaraan biglang humampas ang malaking alon at tinangay sa gitna at malalim na bahagi ng dagat ang mga biktima.

Nakaligtas din ang katulong ng pamilya na si Jessa Desuyo nang makalangoy at nakabalik sa mababang bahagi ng dagat at nakahingi ng tulong sa iba pang naliligo na siyang tumawag ng rescuers.