EX-PNP Chief nagpiyansa sa graft case

NAGLAGAK ng piyansa si dating PNP chief Director General Avelino Razon Jr., at 13 iba pang akusado kaugnay ng kasong malversation at falsification of public documents bunsod nang pagkakasangkot sa maanomalyang pagkukumpuni ng PNP armored vehicles noong 2007.

Ito ay makaraan payagan ng Sandiganbayan Fourt Division na makapagpiyansa sina Razon kasunod nang pagpayag ng anti-graft court sa hirit ni dating National Capital Region Police Office (NCRPO) Director Geary Barias na makapagpiyansa sa kahalintulad na kaso.

Batay sa records ng Fourt Division ng Sandiganbayan, nakapaghain si Razon ng P520,000 piyansa para sa two counts ng malversation at four counts ng graft.

Nabatid na si Barias ay nakapaghain ng kanyang piyansa nitong nakalipas na Lunes sa halagang P460,000.

Bukod kina Razon at Barias, 11 akusado pa ang nakapaglagak na rin ng piyansa.

Nag-ugat ang kaso nina Razon at Barias sa maanomalyang pagkumpuni ng PNP light armored vehicles na nagkakahalaga ng P385.5 milyon noong 2007 sa panahon na PNP chief pa si Razon.