Sexual harassment vs DSWD exec tuloy  — Ombudsman

ISINULONG ng Office of the Ombudsman ang pagsasampa ng kasong sexual harassment sa Sandiganbayan laban sa dating assistant regional director ng Department of Social Welfare and Development (DSWD) Region 8.

Una rito, inireklamo sa Ombudsman si Assistant Regional Director Jaime Eclavea ng isang aplikante na nag-aplay bilang administrative assistant sa DSWD.

Batay sa affidavit ng biktima, sa kanyang unang pagdalo pa lamang sa mga aktibidad ng DSWD ay inimbitahan siya ng suspek sa kanyang bahay sa Tacloban City.

Pinatulog aniya siya sa kuwarto ni Eclavea at doon nangyari ang sexual harassment.

Sa over night trips aniya ay inuutusan siya na matulog sa tabi ng suspek at kung hindi ito gagawin ay sisibakin siya sa bilang administrative assistant sa ilalim ng tanggapan ng Kapit-Bisig Laban sa Kahirapan-Comprehensive and Integrated Delivery of Social Services (KALAHI-CIDSS) sa opisina ni Eclavea.

Sa counter affidavit ng DSWD official, itinanggi niya ang alegasyon at sinabing paninira lamang ito sa kanyang 34 taon serbisyo sa gobyerno.

Ngunit sa inilabas na resolusyon ng Ombudsman, lumalabas na may matibay na ebidensiya sa ginawang pananamantala at paggamit ng opisyal ng kanyang posisyon.