2 patay, 12 tiklo sa anti-drug ops sa Davao

DAVAO CITY – Dalawa ang patay habang 12 ang naaresto sa ‘one time big time’ drug operation ng 12 police stations sa Lungsod ng Davao.

Napag-alaman mula sa Davao City Police Office sa pangunguna ni S/Supt. Vicente Danao, Jr., 12 police stations at Investigation and Detection Management Branch ang kabilang sa mga nagsagawa ng operasyon.

Sa nasabing operasyon, dalawang armadong suspek ang nanlaban kaya nabaril at napatay sa isinagawang raid ng mga awtoridad.

Kinilala ang mga napatay na sina Amar Bara, residente ng Brgy. 76-A, Bucana, Davao City, nakompiskaan ng isang shotgun, .45 caliber pistol, .38 caliber revolver, .22 air gun, dalawang kilo ng marijuana; at  Ronald dela Cruz, nanlaban sa raid na isinagawa sa Legazpi Inn at nakuha sa kanya ang isang .38 revolver at ilegal na droga.

May nabawi rin na iba’t ibang sukat ng sachet ng shabu, at marijuana mula sa mga suspek.

Habang nakompiskahan din ng iba’t ibang uri ng armas ang naarestong mga suspek.