Pinay kinatay ng asawang Taiwanese (Bahagi ng inatadong katawan nawawala)

TINANGGALAN ng laman loob, pinagputol-putol ang katawan ng isang ginang ng asawang Taiwanese sa hinalang may kalaguyo sa Makati City kamakalawa ng gabi.

Kinilala ni Makati City Police chief, Sr. Supt. Ernesto T. Barlam, ang biktimang si Rowena Cobalida Kuo, 47, ng Taylo St., Brgy. Pio Del Pilar ng naturang siyudad.

Ang suspek na si Yuan-Chang Kuo, 46, residente rin sa naturang lugar, ay nasa kustodiya na ng Makati Police .

Base sa imbestigasyon ni PO3 Ronaldo Villaranda, sinabi ng mga anak ng biktima na sina Joanne Jane Tiongco at Ywey Kuo, natagpuan nila ang putol-putol na bangkay ng kanilang ina dakong 9:15 p.m. kamakalawa.

Anila, ang pira-pirasong katawan ng biktima na tinanggalan ng laman-loob ay nakabalot sa green na kumot at nakalagay sa loob ng kanilang stock room sa may ikatlong palapag ng bahay.

Sinabi ng mga anak na nawawala ang kanilang ina noon pang Pebrero 22 ng umaga na inakalang umalis lamang ng bahay.

Ayon kay Joane Jane, kamakalawa ng madaling araw (Pebrero 23) dakong 2:30 a.m., napanaginipan niya ng kanyang ina sa loob ng stock room ng kanilang bahay at bigla na lamang siyang nagising at kinabahan sa pag-aalalang may masamang nangyari sa ina.

Nang sumapit ang gabi, nagpasya silang magkapatid na puntahan ang stock room at pagbukas nila ay nalanghap nila ang masangsang na amoy at tumambad sa kanila ang kaawa-awang sinapit ng ina.

Dali-daling humingi ng tulong ang magkapatid sa mga awtoridad at positibong bangkay ng ina ang natagpuan.

Patuloy na hinahanap ng Scene of the Crime Office (SOCO) ng Southern Police District Office (SPD) ang iba pang bahagi ng katawan ng biktima na posibleng inilagay sa septic tank.

Kasalukuyang nakapiit ang mister ng biktima sa Makati police headquarters at malaki ang pagdududa ng pulisya na siya ang responsable sa brutal na kamatayan ng ginang na ginamitan ng kutsilyong heavy duty.

Matinding selos ang sinisilip na dahilan ng pagpaslang ng suspek sa hinalang may kalaguyo ang biktima.