2 Chinese timbog sa P40-M shabu

ARESTADO ang dalawang turistang Chinese nationals makaraan makompiskahan ng hindi kukulangin sa walong kilo ng shabu na nagkakahalaga ng P40 milyon, sa buy-bust operation ng pinagsanib na puwersa ng District Special Operation Unit (DSOU) at District Anti-Illegal Drugs (DAID), Southern Police District (SPD) sa Pasay City kamakalawa ng gabi.

Kinilala ng officer-in-charge ng Southern Police District (SPD) na si Sr. Supt. Eusebio A. Mejos, ang mga suspek na sina Li Shao Xiong, 35; at Shi Qing Tian alyas Angelo Santillan, 47, pawang taga-Fujian Province, Shi Shi City, China.

Nakapiit na ang dalawa sa SPD detention cell at nahaharap sa kasong paglabag sa Section 5 ng Republic Act (RA) 9165 (Comprehensive Dangerous Drugs Act of 2002).

Sa ulat na nakarating kay Mejos, dakong  9 p.m. nang masakote ang mga suspek sa parking area ng isang food chain (Jollibee/Home Depot) sa panulukan ng Macapagal at Gil Puyat avenues (dating Buendia Avenue), Pasay City.

Makaraang makatanggap ng tip mula sa kanilang asset kaugnay sa illegal na operasyon ng dalawang suspek, agad naglunsad ng buy-bust operation ang mga awtoridad na nagresulta sa pagkakadakip sa mga suspek.