Huwag husgahan si Lt. Col. Marcelino (Apela ng Mistah)

UMAPELA sa publiko ang isang opisyal ng militar na huwag basta husgahan ang kanyang “mistah” na si Lt. Col. Ferdinand Marcelino na naaresto ng PNP-AIDG at PDEA sa isinagawang drug operation sa Maynila nitong nakaraang Huwebes.

“Mataas ang aking pagtingin sa propesyonalismo at integridad ng aking mistah na si Lt. Col Bong Marcelino. Kilala ko siya bilang ma-prinsipyo at may paninindigan,” pahayag ni Lt. Col. Harold Cabunoc na dating tagapagsalita ng Armed Forces of the Philippines.

Sinabi ni Cabunoc, naiintindihan niya kung bakit determinadong maging drug buster si Marcelino at ito ay batay na rin sa kanyang naging karanasan.

Pagbibigay-diin ni Cabunoc, kalaban nating lahat ang droga at dapat ay magkakaisa ang lahat para masugpo ito.

“Nananawagan ako sa ating mga kababayan na huwag natin siya agad husgahan at hayaan natin syang ipagtanggol ang sarili sa proseso ng batas,” wika ni Cabunoc.

Kasamang naaresto ni Marcelino ang Chinese national na si Yan Yi Shou alias Randy, sa isang shabu clandestine laboratory.

Depensa ni Marcelino, siya nasa covert anti-drug mission kung kaya’t nasa lugar siya.

Dating pinuno si Marcelino ng Special Enforcement Service ng PDEA.

Nitong Biyernes, sa inquest proceeding sa Department of Justice (DOJ), iprinesenta ni Marcelino ang isang certification na inilabas ng Philippine Army bilang pruweba na siya ay nasa official mission.