Jueteng namamayagpag pa rin sa Malabon

KINONDENA ng Kilusan Kontra Katiwalian at Kabulukan (4K) ang patuloy na pamamayagpag ng mga ilegal na sugal sa Camanava area partikular sa mga lungsod ng Malabon at Caloocan.

Ayon kay 4K secretary general Rodel Pineda, pulos kamag-anak nina Mayor Antolin “Len Len” Oreta at Mayor Oscar “Oca” Malapitan ang naparatangang nagpapatakbo ng mga ilegal na sugal sa dalawang lungsod kaya nagmimistulang inutil ang mga pulis doon.

“Nagbubulag-bulagan ba ang mga hepe ng Malabon at Caloocan sa lantarang tatlong araw na bola ng jueteng sa kanilang mga lungsod?” tanong ni Pineda. “Ginagamit pa nila para sa campaign fund ni LP presidential bet Mar Roxas ang kita sa jueteng kaya lalo itong dumadausdos sa survey.”

Ibinunyag ni Pineda na isang kabo ng jueteng sa Brgy. Tinajeros, Malabon na alyas “Mari” ang nagmalaki pang may bendisyon mismo ng Pangulong Aquino ang malawakang jueteng sa nasabing lungsod.

“Pati pangalan ni Pinoy nagagamit pa sa jueteng, hindi ba nahihiya si Mayor Len Len sa kawalang aksiyon niya sa lantarang jueteng sa Malabon?” giit ni Pineda.

“Wala na tayong aasahan kay Mayor Oca, sobra ang lakas sa kanya ni alyas ‘Manoling’ kaya nagtetengang-kawali lang siya sa mga ilegal na sugal sa Caloocan.”